بعد فشلي في فتح مطعم اختصاص مقرونة بسبب كورونا
عملت دراسة و كل شي و ماتريال، جات كورونا بدلت البرنامج
جاب ربي ما غامرتش، و لا رصاتلي عامين و انا نخلص في كراء و خدامة بالفارغ
لاحظت اللي لا يوجد مقاهي متخصصة كنوادي متاع جماعة عندهم اهتمامات مشتركة
صحيح تلقى مقاهي مشهورة كونها متاع قمارجية متاع ديمينو و رامي، و مقاهي زعمة زعمة ثقافية فيها 4 كتب مطيشين، او مقاهي اختصاص نادي علاقات عابرة .
فكرتي نضربلها 10 شاشات سامسونڨ 60 بوصة، و 2 حواسيب و نخدملهم شوية قنوات اخبارية (boomerang, cnn) و tradingview في المباشر محلولين فيه الاسهم الاكثر شعبية و البيتكوين بالطبيعة.
بخلاف العباد اتنجم تخلص قهاويها و شربها بال USDT,
ترويجيا ندز فيها BTC accepted here لكن عارف حد ماهو باش يعطيني و باش يخلص بالبيتكوين في وقت bearish market.
. المواطن التونسي يحتاج حل تجاه قانون 3000 دينار اللي عاملو اللوبي البنكي كابتزاز و قانون غير دستوري. في امريكا عادي جدا تهز 150 الف دولار في حقيبة تمشي تخلص بيهم كرهبة فيراري 1970 قديمة و تصلحها و تبيعها ب 200 الف دولار.
رغم ترويجي لحكاية كوني اول تونسي ياخو علوش العيد بالوايز عام 2021 و بالUSDT عام 2022: الا انه ما نجحناش باش نعملو شعبية عل الاقل للعملات الثابتة متاع المنصات.
من ناحية اخرى، العباد باش تهتم بالميدان هذا و باش تتبادل وجهات النظر في حاجات تعمل بيها فلوس.
باش نعمل باذن الله خطوة شجاعة و هو اسم استفزازي شوية "مقهى البيتكوين" و اكيد الناس باش تحكي عليه برشة و اشنوة البيتكوين و غيرو.
النضال الافتراضي و على مستوى المدينة غير كافي، يلزم يتعمل buzz، و تتحط دولتنا قدام الامر الواقع: الشعب يريد العملات الرقمية الثابتة كمدخل لامتلاك العملة الصعبة الرقمية.
بالتالي يترك الكاتابلازما متاع سي PayPal في التسلل.
ماذا بيا كان في المدن الاخرى، يعملو نوادي مقاهي مماثلة
كان جيت نحب نحتكر الفكرة، راني ما قلتش عليها
و باهي مشروع مقهى في تونس، جماعة بنڨردان الكل تقريبا مالكين مقاهي من بنزرت لبنڨردان و نصف المقاهي المفتوحة الجديدة في الجمهورية ليهم. و لو انه مرتبط بتبييض اموال بالنسبة لصالونات الشاي، لكن المشرع التونسي لقى معاهم حل، اي مبلغ مالي تدخلو في "السركوي" يكفي باش تخلص عليه 10% و يرجع légal.
فمة برشة communities في تونس
bikers, campers, fishers, hunters, fintess, hackers etc
الاشكالية باستثناء البحارة و الصيادة كلها خاسرين في هواياتهم
لكن في برنامجي الطموح ل 200 الف traders تونسي رابح و هنا متاثر برشة بالخدمة الجبارة متاع عم حسن الشتيوي في community متاع grain farmers
نجح باش يعمل community متاع قرابة 50 الف فلاح و صاحب ارض زراعية في تونس
هذا نخرّف من وراء الحاسوب، موش كافي.
لانه الهدف متاعي: نخلصوا ديون الدولة التونسية و نبعثوا البنك الدولي و بعدها نبعثوا فرنسا و في ظرف 10 سنين نرجعوا دولة متقدمة عندها سيادة تكنولوجية و سيادة جامعية و سيادة دينية و سيادة دفاعية و سيادة مائية و سيادة غذائية و سيادة فلاحية و سيادة طاقية و سيادة لغوية و سيادة مالية و سيادة قانونية الخ لانه وين تدور تلقى ما فماش سيادة بالفم و الملا، و هذاكة علاش ديمقراطية ما تنجحش.
ما نحشموش على ارواحنا، شركة Tesla القيمة السوقية متاعها يفوت الناتج القومي الخام من الثورة ليوم الناس هذا؛ ما انتجه التونسيون في 12 سنة.
لا عندنا "فرخ" عندو منصة قلب قلبة باهية و نهب الفلوس لتونس (و لو انه اكيد باش يفرحو بيه و يسلموه و يرجعوا الفلوس)
لا عندنا واحد عمل "لعبة باهية" و تباعت
باستثناء خونا التطاويني متاع الذكاء الصناعي اما الفلوس قعدت البرى، ما دخلتش لتونس.
نعم تونس بحاجة لمقاهي استثمارية، و اسم البيتكوين اسم استفزازي جيد حسب نظري!
Mitula Immo
Posts
حبيبي ليس يعدله حبيب *** ولا لسواه في قلبي نصيب حبيب غاب عن بصري وسمعي *** ولكن في فؤادي ما يغيب يا حبيب ...