العنصرية البغيضة نعانيو منها في الخارج نمارسو فيها في تونس .. قالك قومية تونسية وضد الاستيطان الأجصي !! - موضوع جديد في المنتدى الذي تتابعه

منتديات تونيزيـا سات franky01 قام بنشر موضوع جديد في القسم الذي أنت تتابعه في منتديات تونيزيـا سات. العنصرية البغيضة نعانيو منها في الخارج نمارسو فيها في تونس .. قالك قومية تونسية وضد الاستيطان الأجصي !! كيفي كيف الألوف المؤلفة من التوانسة والجزائريين والمغاربة إلي كملو قرايتهم في الخارج وحتى إلي حرقو وإلي سافرو يخدمو .. يبدا عندك "tête d'arabe" كيف يقولو يعني ملامح عربية ماكش أزعر وعينيك فاتحين راك باش تمارس ضدك العنصرية في المعاملات اليومية الغير رسميّة .. نتفكر الأيامات الأولى، راكب في القطار وهو معبي وأنا قاعد فكا الأربع بلايص المقابلين بعضهم حد ما جاء قعد بحذايا للي هلوست ونتفقد في روحى من غير ما نشلق تطلعشي الواحد زقت عليه حمامة ولا درا شصارلو وهو ما فيبالوش .. وصارتلي بعد ما وليت قديم وفاهم السبب وكنت وقتها ما عمباليش بيهم بالعكس هاني مستاسع ويمشيو ***** لكل هوما والعنصرية التافهة متاعهم .. في كاسة عادي الحريف إلي قدامك يبدا من أهل البلاد هذيكة تقلو "bonjour monsieur" مع ابتسامة عريضة معاك أنت لا بونجور لا ابتسامة تقول باش تعطيك بلاش القضية .. في السبور ساعات نفلت باساج متع ڨراد خاطرو يصير بالأحد وأنا في غالب الأحيان نخدم بالأحد والمدرب كان يرفض يعديلي في وسط الجمعة .. لكن مع ذلك زميلتي في السبور يعديلها في وسط الجمعة خاطرها من أهل البلد .. تبعث cv باسم عربي عندك تقريب 7 مرات حظوظ أقل في entretien مقارنة بأنك تبعث نفس ال cv لكن باسم فرنسي .. وهذا حسب برنامج تلفزيوني مصور وثق الحكاية هذه .. قرات معايا وحدة في المكتب بوها تونسي وأمها فرنسية وبعد المكتب طلعت لفرنسا، هي شقراء ما تجيبهاش فيها، تقص الكونتاكت وبعد لقينا بعضنا في فرنسا على الفايسبوك، تحكيلي ساعات كيف يبداو يعاملو فيها كوحدة منهم وبعد أول ما يسمعو اسمها المعاملة تتبدل جملة.. وهذا شويا من برشا ملي يتعدا على العربي في أرووبا بنسب متفاوتة لكل واحد .. ومن غير ما نطول خاطر كان باش ننقل إلي نعرفو وإلي حكاوهولي باش نكتب صفحات.. العنصرية تجاه العرب والمسلمين موجودة ما ينكروها كان جماعة جلد الذات والانبطاحيين إلي تلقاه ناكر في أصلو ومهزوم من داخل.. كان عندي بعض الأصدقاء الأفارقة، عز الناس، دين وأخلاق.. أغلبهم من مالي والسينيغال منهم إلي بأوراقه ومنهم إلي بلاش أوراق.. وكنت نعرف إلي أهل مالي يحكيو "بامبارا" وأهل السينيغال يحكيو "وولوف" وكنت نحفظ بعض الكلمات من اللهجات هذيكة .. تعاشرنا، ونتفكر مرة صديق سينيغالي يدوّر في الزيرو يبيع في des disques durs externes Porsch Design مرة قابل حريف فرنسي حسو عنصري من كلامو، السينيغالي سمّع الكلام للفرنسي وقالو مانيش بايعلك وعطاني أكا الديسك بلاش قلي شماتة فيه نعطيه ليك أنت صاحبي وما نبيعوش ليه هو، لتوا عندي الديسك .. مؤخرا نشوف في ترند جديد "ضد الاستيطان الأجصي" وما فهمتش ها الكلمة المڨملة منين جات .. وموقع القومية التونسية .. وباجات سبونسوريزي تبث في العنصرية بأسلوب شعبوي رديء .. أكثر سكان تونس تقلو تحب تمشي لأوروبا تستقر وتخدم يقلك نحب .. تقلو تحب تُمارس ضدّك العنصرية غادي يقلك لا .. مالا علاش النفاق !! هاك تمارس فيها أنت ضد الأفارقة في تونس .. وتشوف أكا الحجج الواهية إلي يسوقو فيها قالك خايفين على الجينات التونسية !! شوف أكا الجينات الهايلة عاد !! معمّرين نعيشو أغلبنا فوق ال 100 بلاش أمراض مزمنة ؟ لا بالعكس ما نعيشوش برشا وماكلتنا الأمراض المزمنة .. أخلاق ودين ومروؤة وخايفين على ديننا والمنظومة الأخلاقية لا يفسدوها الأفارقة ؟ لا .. بنية جسدية مثالية ورياضيين من الأوائل في العالم وخايفين على الجينات هذه ؟ لا .. ما فهمتش ها الجينات الثمينة إلي خايفين عليها يقلك بنفس الأسلوب الشعبوي كان نكملو هكا تتلز نهار آخر تعطى بنتك لولد ديارا وولد تراوري .. ولد ديارا كان متدين وقاري وأخلاقو باهية ويخدم وقادر يوفر الاحتياجات الضرورية لعائلته علاش لا ؟ هو خير ألف مرة من ولد جميلة زبراط مركبها لروحو إلي هو فصالة وهو زكيم مخو وقف في ثالثة د .. إذا جاءكم من ترضون دينه وخلقه فزوجوه موش من ترضون جنسيته ولون بشرته.. وحتى أنا كراجل كان ماجيتش معرس آش فيها كان عجبتني افريقية وخذيتها وحتى كان جيت في الجزائر أو ليبيا آش فيها كان خذيت الزوجة الثانية افريقة كان عجبتني.. ما فهمتش وين المشكل كان تونسية خذات افريقي طالما هو كفء ولا تونسي خذا افريقة طالما لقا فيها الصفات إلي يحبهم .. ومن الحجج بودورو زادة يقلك باكو الحليب إلي باش يشربو الفريقي التونسي أولى بيه .. الافريقي في أغلب الحالات يخدم الخدم إلي التونسي ما يحبش يخدمها كيف الفلاحة وخدمة في لافاج في الشتاء إلخ.. ومولا المول كيف يعطيه 20 ولا 30 دينار راهو بديهيّا مصوّر من جرتو أكثر من أكا ال 30 دينار يعني الافريقي قاعد ينتج ويصنع في الثروة (لعرفو التونسي موش ليه) معناها عندو الحق في الموارد زادة إلي هو أصلا باش يشريها بفلوسو .. من الجهل أنهم يحبو يركبوها للناس إلي الافريقي قاعد يعملك في concurrence على الطعام !!! الواحد كيف يسافر ويشوف الثقافات الأخرى أو حتى يطّلع عليها من غير سفر حريّ بيه أنه يولي يشوف ثقافته بنسبيّة ماعادش يشوفها معيار يقيّم من خلاله الثقافات الأخرى ومعادش يشوف الثقافات الأخرى بعلويّة.. نرا إلي العنصرية تجي من الجهل والتكبر أحدهما أو كلاهما.. مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات