نظام المواطن الصالح - v.2.0 الرقمنة والذكاء vs الدهاء الإجرامي - موضوع جديد في المنتدى الذي تتابعه

منتديات تونيزيـا سات أحمد عبد الرزاق قام بنشر موضوع جديد في القسم الذي أنت تتابعه في منتديات تونيزيـا سات. نظام المواطن الصالح - v.2.0 الرقمنة والذكاء vs الدهاء الإجرامي السلام عليكم و رحمة الله و بركاته هو الوضع في بلادنا ماشي و يتعب إقتصاديا بسبب الأزمات ، ما يهمش الأزمات مفتعلة بفعل فاعل و إلا نتيجة حتمية لسياسة معينة و أحداث و تفكير فئة خارجية أو داخلية حابة توصلنا للوضع لي أحنا فيه و ماشيين ليه. السلط المعنية سوى الرئيس، الحكومة ، الوزراء أو حتى الوزارات و بقية الهياكل من مركز الأمن في الحومة حتى الشرطة الحدودية و وزارة التجارة بما فيها من آليات المراقبة و بقية الهياكل لي تابعة الدولة اليوم تعيش في أزمة كبيرة نوعا ما كي تشوف اللي البنوك ما فيهاش ليكيد بسبب قروض ما خلصتش و أطنان من المواد الغذائية مكفنة في قاراجات و مشاريع فالسة كانت توكل في الزوالي و ناس هجت و حرقت و ماتت و تباعت و تشرات كعمالة رخيصة و ناس تخبي في القهوة و الحليب و المقرونة و ناس عاملة دبوات تستوكي في الكنترة بخلاف لي مخبي مليار تحت الزليزة في الدار و اللي مخرج مالية و يبيض فيها بمشروع والا زوز و مكسر عشرات القطع الأثرية لي كانت عادي تجيب مليارات للبلاد ، والناس لي في التوريد و التصدير لي تجيب في السلع من علي إكسبريس و موقع علي بابا (Alibaba) بأسعار ممتازة و يجيك لتونس لي شراها ب10 دولار تتباع ب40 و الدولة ماهيش هنا و المواطن العادي حتى كي يسترزق و يحب يبدا مشروع يلقى الحيتان مسيطرة على البر بما فيه سوى المواطنين الLocal أو رجال الأعمال المستقرين في تايلاند من غادي يشري و يبيع و يحكم بأحكامه... شنوا الحل كيما قال ربيع بودن؟ آني باش نقول الرقمنة و ماهيش لغة تلفزة و كلام في الإذاعة من ناس مش فاهمة و تحكي على تكنولوجيا ما تفهمش فيها... الرقمنة يا سيدي هي عبارة على إستعمال التنكولوجيات الجديدة بكل أطيافها من البرمجة للبلوكشاين للماكينات متاع الPOS/ KIOSK Machines (كيما متاع Runpay لي في المغازات) وصولا لتطبيقات المحمول ، لقواعد البيانات بالذكاء الإصطناعي و حتى "الوشاية" كوسيلة تبرر الغاية ، كيفاش؟ هذا موضوع اليوم: باش تحارب الفساد وحدك هذا أمر ميؤوس منه، باش تحارب الفساد بتقسيم المواطنين ؟ أمر ممكن جدا. كيفاش؟ المواطنين أنواع صالح و طالح وهكاكا ربي لي يحاسب و القانون كذلك ، الحل هو الرقمنة لتسهيل الوصول للمعلومة و حتى لوصول المعلومة لينا كشعب وللقضاة و للرئيس و غيروا بدون تدخل من البيوعة و القلابة و الناس اللي تبيع في الريح للمراكب. تعمل نظام يعتمد على تقنيات البلوكشين بحيث المعلومة كي تدخل معادش تخرج والا تتبدل تبقا محفوظة نسختها الأصلية و كان فما تحيين يتسجل في نسخة (updated version) و تبقى كل النسخ محفوظة للإستعمال. و النظام هذا بعد ما يتطور يتم إستعماله كقالب جاهز لإنشاء منصات متعددة لكافة وزارات الدولة و المؤسسات العمومية وللمواطن بحيث المعلومة توصل و الشكاية توصل و ما تضيعش و ما تتفسخش و الهياكل الرقابية من الفوق بدئا بالرئيس وصولا للمواطن تكون كلها على إتصال بقاعدة البيانات حسب ما يسمح القانون بالطبيعة و حسب نوع الشكاية سوى قضية رأي عام و إلا شكاية تتعدى على المسؤولين المسموح بيهم وصولا للرئيس و للمحكمة والقضاة المكلفين و عندما يستوجب الأمر تكون المعلومات مفتوحة للعموم و يتم تخصيص واجهة للمواطنين للإدلاء بإفاداتهم بعد التحقق من هويتهم بإستعمال منصة الهوية الرقمية الجديدة. الشي هذا يتطبق حتى في ماكينات متاع KIOSK بحيث تجي تشري تيكي وتقضي أمورك و كان عندك شكاية تشكي سوى بإستعمال الماكينة كانك مواطن زوالي و إلا بهاتفك الخاص و هكا بالسيف المعلومة تتحفظ في قواعد بيانات ما يقدر حد يفسخها و الا يبدل النسخة الأصلية للشكاية أو يتلفها. هكا تكون متوفرة البيئة اللازمة للعدل و باش المواطن يقوم بدوره و يتحمل مسؤوليته و الإدارات تكون على علم بكل شيء يتشكى منو المواطنون. بالنسبة للدولة و البيئة في بعض المناطق ينجموا المختصين يعملو منصات لجمع التبرعات ، مش تبرعات لكن ّإسهامات للدولة و حتى كولاكت لجمع المال لغاية معينة مثلا كياس مكسر نجيبوا خبير ولد بلاد(بوبلاش) يشوف قداش يتكلف المشروع ، نتفاهموا مع مقاول ثقة (ما يهمش منين أصلو بالطبع المفيد تونسي) و نجمعوا التبرعات لين تتلم الفلوس الكل و يخدم السيد خدمتو و كي يكمل يخلص في فلوسو و بالنسبة لشريان السلعة الدولة تنظم صرفان المواد الأولية من الفلوس لي تلمت مع خبير و بحيث يمنع على الشخص هذا السفر لخارج تراب الجمهورية طيلة فترة المشروع و كي يكمل الخدمة يهز فلوسو كاملة ، يربح ثقة الناس و الناس تعرف جودة الخدمة متاعو خاطرها كولاكت الناس الكل سمعت بيها و هكا هو يكون مجبور يخرج كاليتي باهية. نمشيو لقضايا الفساد و تخبية السلعة في القاراجات سوى المهربة أو المدعومة من الدولة، تكون فما منصة للشكايا الجهوية للهيئات المختصة و تكون الوزارات و الرئيس و الإطار الحاكم في البلاد من شرطة للرقابة و بقية الجهات المعنية على علم و يكون عندهم حسابات مراقبة و تكون المنصات هاذي متصلة بالمطارات و بالوكالات الخاصة بالأسفار ففي حين صدور شكاية على شخص يحجر عليه السفر حتى البت فيها و يكون البت سريع و التأكد تقريبا فوري والضغط هذا يخلي الناس تعرف أحجامها مع الوقت و تخاف و تلتزم بالقانون و إلا تتحاسب. بالنسبة للمواطنين الفقراء و اللي ما عندهمش ملجأ و مستحقين عناية الدولة لازمها تسيطر عالوضع ضد الفساد لي صاير والناس المجرمة لي تسرق في فلوس الناس بتعلة أنها لاهية بإنسان مسكين تاعب في حياتو والحقيقة أنها تاكل في الفلوس هاذيكا... لازم منصة مربوطة بالمنصات اللي سبق ذكرها تكون فيها خدمة تسجيل أسماء الناس هاذوما و تصرف عليهم بما يسمح و علاش لا تلم تبرعات الشعب رقميا مش عبر مجموعات و صفحات الفايسبوك هكا يولي دور الصفحات هاذي هو إشهار الناس هاذم و النقائص والتبرع يتم عبر منصة تدعمها الدولة التونسية. مع هذا يلزم عروض الشغل والمناظرات و الإمتحانات و كل ما يهم الطالب التونسي والتلميذ و المواطن يكون كل شي سبق و ذكرتو في الموضوع في موقع إلكتروني وحيد أو عالأقل تكون فيه صفحة رئيسية تعدي لبقية المواقع والخدمات بحيث المواطن يسجل حساب و يفعل الحساب والهوية بالهوية الرقمية و بفيديو مثلا و بعتالي يدخل يقوم بكل الخدمات متاعو. بعد ما تتطور المنظومة يزيدو مواقع أخرى يتم إدراجها تكون هي الخدمات المالية المتوفرة في البلاد و الموثوقة من بنوك و مؤسسات مالية و غيرو باش المواطن يعرف أناهي المؤسسة لي تتسابق عالرقمنة و عندها حماية و أمان أكثر و هكا يسجل فيها ويترك البقية للنسيان. بالنسبة للبنوك يلزم يتفرض عليها إنو أموال المواطنين اللي يصبوها في البنوك ما تتعطاش قروض للبراني ولرجال الأعمال فقط للدولة و هياكل الدولة التونسية لي تنجم تعطي منها قروض لرجال الأعمال مع إعلام المواطنين و عملاء البنك و بضمان من الدولة على عدم نهب أموالهم في حالة إفلاس الدولة و تعويضها مثلا بأراضي من أملاك الدولة أو تعويض خدماتي أو شيء من هالقبيل. كذلك ، البنك المركزي يتحدث على الرقمنة و غيروا لذلك وجب على الدولة السماح للمواطنين بالحصول على حسابات رقمية تخوللهم إدخال العملة الصعبة و التجارة وفتح السوق للمواطنين باش تكثر المنافسة على التوريد و التصدير و بالتالي الأسوام تنقص شوية و إحتكار رجال الأعمال للسوق يتنحى بحيث يكون المواطن قادر يخدم على روحو يبيع الدقلة و الزيت و السلع الحرفية مباشرة بأسوام تساعدو هو مش الهيئات و الناس لي تصدر توا... وعلاش لا كان الدنيا دنيا يولي عندنا منصة تابعة الدولة يسجل فيها التونسي وياخذ رخصة ويحط معلومات حسابه البنكي و يحل مباشرة حساب رقمي و يكون حق تدخيل العملة الأجنبية متوفر مباشرة و الصرفان يكون محدود ومقبول نوعا ما إلا في صورة ما إذا ثبت أن الشخص دخل برشا فلوس بالعملة الصعبة هكاكا تولي فما رتب للحسابات هاذي TIER 1,2,3 VIP etc و هكا أوتوماتيكيا ياخذ رخصة تخوله يرفع من سقف المعاملات خاطر ثابت عليه أنو إنسان عاون الدولة و حابب يكبر مشروعه و هكا الناس الكل فرحانة الدولة والأشخاص عوض الحال لي نعيشو فيه وقت الناس تجيب فلوس للدولة و البنك المركزي يعطي في الفلوس من الخزينة لأوريدو و غيرها من مواقع القمار و مواقع الخدمات الأخرى... المواطن لازم يكون داخل هالتجربة و يعيش الحرية المالية مع تشجيعه بالطبع على عقلية التجارة والربح وليس الإستهلاكية الحيوانية ... باش تحقق الحاجات هاذي و توفرها لازمك ناس تخدملك المنصات هاذي وهوما طلبة المعاهد العليا و المتخرجين من الهندسة الإعلامية بمختلف أطيافهم. فما منهم ناس مستعدة تخدم ونافحة و تحب توصل ولكن ما لقاتش الحظوظ متاعها و إنتي تنجم تعمللهم إستقطاب (لعدد مهم منهم) لي يكونوا خبراء وفاهمين مع سينيور مطور و ناس عندها الكفائة للمراقبة والمساعدة و الإشراف و تخرج أحسن برودويات تقنية مع إشراك الطلبة و المتخرجين و مساعدتهم ماديا لبناء خبرة أولا ، لتطوير معارفهم و لمساعدة دولتهم، وعلاش لا تختار منهم فئة توظفهم لحماية المنصات هاذي و تجديدها مع الوقت و تكون إنتي رابحة كدولة و المواطن رابح و التاجر رابح و الطلبة و المهندسين المبرمجين رابحين إنو شوية منهم يخدموا و يساهموا في بلادهم و ياخذوا شهرية كي غيرهم. الشي هذا باش ينقص صرفان برشا مازوط و إيصانص ، يرتح برشا ناس كبار في السن ، يقلل من الفساد في الدولة ، يساهم في إجبار الناس على إتباع القانون و يساهم في تصليح البنية التحتية للدولة و إنجاز مشاريع جبارة ممولة من الشعب التونسي والمواطنين في الخارج و يهز بلادنا لثنية جديدة تدعونا باش نتفائلو و نهزو راسنا شوية. الناس فدت من تخريج بطاقة التعريف والفلوس لي تتصرف ديما هاو تصويرة هاو مطلب هاو جواب ، تولي في عوض تكسر راسك تمشي مرة بركا تلم كل شي و تبعثو في جواب وبقية الخطوات تصير أونلاين و تخليص الأدائات يتم إلكترونيا. الفكرة ساهل تتحقق لا صعيب لا شي ، يلزمها ناس تخدم وتحب توصل باش تقضي على الفساد و هكا كي تحقق الشي هذا تولي تنجم تعمل مراقبة في الكياسات و كاميراوات بارتو ، توا ينقص البول(حاشاكم) في التراكن و اللواط والسرقة و البراكاجات و غيرو و الناس تنضبط ، الناس ما تسيبت كان ما فقدت الرقيب... مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات