عالم ألعاب الفيديو... الوحش الإقتصادي - موضوع جديد في المنتدى الذي تتابعه

منتديات تونيزيـا سات Black_Hole قام بنشر موضوع جديد في القسم الذي أنت تتابعه في منتديات تونيزيـا سات. عالم ألعاب الفيديو... الوحش الإقتصادي ايا قلنا السلام عليكم شكون فينا أبناء الجيل الذهبي "80-99" ما عاشش أسعد لحظات الطفولة مع تلك الآلة الصغيرة العجيبة صندوق العجائب متاع عصرنا الحالي الأتاري..النيتندو..البلاي .. كل واحد و كيفاش كان يسميه ببساطة اكا القطعة الالكترونية الي تربطها بالتلفزة و تحلك عوالم من الخيال و الاندماج و المتعة البصرية و السمعية و الإثارة لما نقولو "ألعاب الفيديو" ، برشا مالاسم وحدو ينفرو و يقلك ألعاب للأطفال و ريق فروخ مانيش باش نناقش الجملة و لا باش نحاول ندحضها ألعاب أطفال ...باهي... ألعاب أطفال ...رأيك و انتي حر اما الي باش نحكيو فيه هو اقتصاد صناعة ألعاب الفيديو و كيفاش الي تراها انتي ألعاب أطفال قاعدة تدخل في أموال مهولة للعديد من الدول أموال و أرباح ما تنجمش تتخيّل انها تفوق اقتصاد دول بأسرها كيما تونس مثلا اي نعم عزيزي القارئ .. لعبة متاع ذري و طاف طاف طاف هذيكا تدخل فلوس اكثر من ميزانية هالرقعة الجغرافية الي تنكد ليل و نهار من اجل بعض دنانير ماكش مصدق ! شد عندك نهار 18 جانفي 2022 ، شركة مايكروسوفت أعلنت استحواذها على شركة تطوير و نشر ألعاب الفيديو Activision بمبلغ قدره 68.7 مليار دولار !! فاهمني فاش نحكي ؟ نعاودلك شركة تصنع في العاب فيديو تباعت بي 68.7 مليار دولار ​ و باش تستوعب الرقم عزيزي القارئ فأنو الناتج القومي لتونس سنة 2021 يسوى 46 مليار دولار​ معناها شركة وحدة مڤملة قيمتها اكبر من تونس بمواردها، ببترولها، بفسفاطها، بقيس سعيد، بالطبوبي، بتونيزياسات، بيا و بيك انتي​ فتخيّل معايا لحظة انو كان جات الشركة تونسية ?.....What If​ معناها بين نهار و ليلة يتصب في البنك المركزي متاعنا 68.7 مليار دولار الي مخزونو الكل مالعملة الصعبة ما يفوتش 8 مليار دولار و عمرو ما شاف 10 مليار دولار في حياتو تي خزينتو ما تطرشق و الدولارات تفيض مالشبابك متاعو و تطيح في الشارع و تولي تونس خضراء بالرسمي قبل ما تتحمس برشا خلي نبسطو شوي المفاهيم اي لعبة فيديو تتخلق في شركة فيها مبرمجين و مصممين و مهندسي اعلامية الشركة تتسمى مطوّر اي هي الي طوّرت اللعبة و صنعتها من بعد الشركة هذي تعطيها لشركة اخرى تتولى تسويقها و اسمها ناشر الشركة الثانية مهمتها نشر اللعبة باش تولي مطابقة لمنصات اللعب الموجودة كيما الهواتف المحمولة و الحاسوب و اجهزة اللعب كيما بلايستايشين و اكس بوكس و من بعد اللاعبين يشريو اللعبة و يلعبوها و كل ما تكون اللعبة هايلة ، كل ما عدد المبيعات متاعها يزيد كل ما اسم المطوّر الي عملها يضرب في الساحة و لعبة بعد لعبة ، المطوّر يثبت للرأي العالمي انو عندو ما يقول في روحو و ولد دومان لهنا شركات الاجهزة كيما سوني و مايكروسوفت يولي من مصلحتهم انو المطوّر و الناشر يعملولهم اللعبة حصرية كان ليهم اش معناها حصرية ؟ معناها اللعبة هذي ما تتلعب كان بالجهاز هذا اللاعب يشري بلايستايشن مثلا و ما يشريش اكس بوكس خاطر اللعبة ولات تتلعب كان عالبلايستايشن و باش اللعبة تولي حصرية ، شركة الاجهزة يا تتفاهم مع المطوّر و تشحملو فلوس باش يرضخ يا تشريه هو و خدامتو و مهندسيه و تخليهم يخدمو تحتو و هذا الي خلى السوق يزدهر عادي جدا مجموعة شباب مهندسي اعلامية و تقنيين يتلمدوا و يحلو شركة صغيرة راس مالها 3 حواسيب و اشتراك انترنيت و شوي لوجيسيالات بعد 4 سنين شركتهم تولي تسوى مليارات هوما يربحوا و بلادهم تربح في جرتهم مثال على ذلك استديو 111Dots studio هذا استديو صغير في فيتنام عملوه مجموعة شباب معلمية في البرمجة الاستديو طوّر سنة 2017 لعبة فيديو اسمها Free Fire و نشرتها شركة Garena على اجهزة الهواتف المحمولة اللعبة ضربت للسماء و اكيد راك سمعت بيها كان موش لعبتها اللعبة عملت ارقام قياسية تاريخية كأكثر لعبة تحميلا على الاجهزة زيد عليهم وصل عدد لاعبيها لي 80 مليون لاعب !! الاستديو الفيتنامي المڤحول حقق ارباح سنوية من عام 2018 معدل متاع 2 مليار دولار كل عام !! اي نعم كل عام 2 مليار دولار ربح في جيب المطوّر و طبعا فيتنام اكا البلد الفقير طلع رابح في النازلة في الوقت الي تونس مثلا تتشحت صندوق النقد من اجل قرض بي 1.6 مليار دولار على 4 سنوات شوف الضرب كيفاه ! الي حبيت نوصلو انو العصر تبدل و الزمن تغيّر لغة الصناعة و الفلاحة معادش توكل خبز للبلدان الفقيرة المفلسة خاطرهم ميادين تتطلب استثمارات مادية مهولة و برشا فلوس تبدا بيها فالحل هو كيفاش تلقى ثنية تنجم تربح هم فلوس من غير مصروف زايد صحيح تطوير الالعاب ماهوش ميدان ساهل و الجانب التقني معقد برشا و لازمو دماغات و مادة شخمة اما كان تلوج في كل شركات الاعلامية عبر العالم ، اكيد باش تلقى عدد لا باس به مالتوانسة المتغربين توانسة مبدعين و نوابغ لفظتهم بلادهم و لقاو حظهم ما وراء البحار مالمانع في اقتحام ميدان البرمجيات و التكنولوجيا ؟ مالمانع تشجع و تستثمر و تستقطب المواهب هذي ؟ يا سيدي ما تستقطب حد ، فقط امنع نزيف هجرتهم المتواصلة و شجعهم و اعطيهم كل شي يخليهم يبداو يخدمو الولايات المتحدة مثلا تقدم اعفاء ضريبي 35% لكل شركة ناشئة راهي امريكا ام الرأسمالية و عاملة هكا فما بالك بدول حاسبة روحها اجتماعية صحيح الميدان هذا عبارة على لعبة ياناصيب .. تنجم تلعب 100 مرة اما المرة الي تخطفلك فيها حياتك تتقلب وجه على عقب ?....What If ختاما منجمتش نكمل من غير ما نرد على جماعة ألعاب الفيديو للأطفال و كيفاش عزلوك 35 سنة و راكش على بلايستايشن و لا تعرفوش كيفاش هاو شكون يرد بلاصتي " L'opposé du jeu n'est pas le sérieux, mais la réalité " Sigmund FREUD نخليكم مع بعض الارقام مالعالم هذا تطور حجم اقتصاد العاب الفيديو في العالم (مليار دولار) حجم العائدات من سوق الألعاب لأكبر 25 دولة سنة 2018 1- الصين 38 مليار دولار 2- الولايات المتحدة 30 مليار دولار 3- اليابان 19 مليار دولار ​ مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات