موضوع اقتصادي: اسعار الغذاء، شنية الوضع بالنسبة لتونس، هل باش نلبسوا casque كيف عمناول ؟ موجة جوع قادمة، البسوا casque الجزء الثاني نسخة 2023 - موضوع جديد في المنتدى الذي تتابعه

منتديات تونيزيـا سات Hamdi-Sfax قام بنشر موضوع جديد في القسم الذي أنت تتابعه في منتديات تونيزيـا سات. موضوع اقتصادي: اسعار الغذاء، شنية الوضع بالنسبة لتونس، هل باش نلبسوا casque كيف عمناول ؟ موجة جوع قادمة، البسوا casque الجزء الثاني نسخة 2023 سلام كتبت موضوع في نهاية 2021 نحذر من ارتفاع الاسعار و امكانية فقدان بعض المواد الغذائية من السوق نتيجة ازمة سلاسل التوزيع و ارتفاع اسعار المحروقات على جميع الدول و الشعوب. https://www.tunisia-sat.com/forums/threads/4247312/و هذا جزء مما قلته Hamdi-Sfax قال: ما نعرفش كدولة تونسية شنية الخطوات الي باش ناخذوها أو خذيناهت باش نحصنوا رواحنا ضد موجة التضخم العالمية. لكن من المؤكد انه العالم تستنى فيه موجة جوع في 2022 اذا تواصلت ازمة الطاقة شهرين اخرين و ستتواصل لاننا قادمين على شتاء صعيب و الغاز لازم للتدفئة و اوروبا مثلا ما عندهاش احتياطي كافي للشتاء و الأمر كان عنيف جدا اكثر مما توقعت بسبب الحرب الروسية الاوكرانية. هو احقاقا للحق، البيت الابيض توقع التدخل العسكري منذ شهر اوت 2021. و ضغط بشكل كبير على المانيا لسحب رخصة استغلال انبوب الغاز الجديد نوردستريم. و تأكدت مخاوفه نهاية العام وقت عملت ستوك هايل من كل المواد الي تدخل في تصنيع الرقائق و تصنع فيهم اوكرانيا تحسبا للحرب. ( حكيت على الموضوع سابقا ). https://www.tunisia-sat.com/forums/threads/4274166/ نسبة التضخم على السلع الغذائيو في تونس وصلت 13% في اعلى نسبة منذ 2007. ( المصدر التوقعات بخصوص المحاصيل و حالة الغذاء Publication preview page | FAO | Food and Agriculture Organization of the United Nations ). السؤال الجدي في الوقت الحالي، لوقتاش باش نلبسوا casque. الى متى الازمة هذه باش تبقى؟ باش نعرفوا الاجابة على السؤال لازم نشوفوا مؤشر منظمة الاغذية و الزراعة لاسعار الاغذية. مقارنة بين مؤذر الاسعار في 2021 و 2022 باش نلاحظ ارتفاع كبير في الاسعار ب 18% و هذا شفناه على مدار العام. لكن في الشهور الاخيرة بدات الاسعار تتراجع و تحديدا بداية من شهر أوت. كل مرة الindex يطيح و حاليا رجعنا لمؤشر ديسمبر 2020. تفسير الامر هذا مرتبط ببرشا عوامل اهمها التضخم الي اجبر برشا عائلات على خفظ استهلاكها ( و هذا تفسير شخصي ). لكن موش كل المواد تراجعت اسوامها. مثلا سوق السكر العالمي شهد ارتفاع في الاسعار ثم بداية انخفاض شهر جانفي بسبب بداية الحصاد في تايلاند و الهند و البرازيل. ممكن الاسعار باش ترجع ترتفع لانه فما شك انه الهند تنقص من حصتها في الصادرات لتواضع محصولها. نجيوا للزيت حبيب الملايين. خوكم شميتها قارصة شريت كمية زيت هايلة و نقصنا من استعماله في الطبخ من قبل بداية الازمة. ازمة الزيت بدات وقت اندونييا قررت انه على كل ليترة زيت تخرج، المصدر يدفع ديوانة. تحب تبيع في السوق المحلية مرحبا بيك. الحكومة عملت هكا باش تسيطر على ارتفاع اسعار الزيت في السوق المحلي. و كذلك قامت الهند. زيدهم اوكرانيا خرجت من السوق. فبالتالي البس يا وحش. لكن الاسعار تراجعت و الحمد لله في السوق العاملية. السوق عدل نفسه بنفسه نتيجة انخفاض الطلب اولا. ثانيا الحصاد في الارجنتين باش يبدأ و توقعات ممتازة انه يتعدى في ظروف باهية. لكن الارجنتين حاليا تتعدى بجفاف. صابة الزي منعت. لكن صابة القمح صعيب شوية. الارجنتين زادة تأثر على صادرات الذرة. عندها موسم جفاف قادم و الاسعار بدات ترتفع. خاصة و انه منتوج الولايات المتحدة منخفض. لذا الاسعار ارتفعت. بالنسبة للقمح فما انخفاض لانه العام صابة في استراليا و الاتحاد الروسي. تونس عندها ستوك من الحبوب يقدر 1,1 مليون طن. ( المصدر التوقعات بخصوص المحاصيل وحالة الغذاء | GIEWS - النظام العالمى للاعلام والانذار المبكر عن الأغذية والزراعة | منظمة الأغذية والزراعة للأمم المتحدة ) و هي نفس الاحتياطيات الي مستانسة بيها البلاد منذ سنوات). كل عام تخبي مليون طن. لكن نفس التقرير يشير الى انه بالنسبة لتونس و بسبب تراجع كميات الامطار المسجلة في شهر نوفمبر, ممكن تواجه صعوبات. نفس الشيء بالنسبة للجزائر و اخطر شوية بالنسبة للمغرب. في ليبيا كمية الامطار كافية للفلاحة و الانتاج. باه مستقبلا شنو باش يصير.. باش تنخفظ الاسعار و الا لا؟ باش تعرف لازمك تشوف اسعار الاسمدة. الاسعار عالميا في انخفاض لكن موش بالقدر الكافي و ما رجعتش لاسوام 2020. الغاز الطبيعي يدخل في انتاج الاسمدة. و الغاز الطبيعي اسوامه نار. بالاضافة الى انه الصين عملت قيود على صادراتها من الاسمدة و متواصلة منذ 2022. لذا الاسعار باش تنخفض بسبب تراجع كلفة الانتاج. لكن موش انخفاض كبير. و بصراحة ما فماش امل كبير انه العام المقبل الاسعار تزيد تنخفض. لانه و ببساطة الازمة الروسية الاوكرانية متواصلة و اوروبا و بيلاروسيا و الصين و روسيا هم اكبر المصنعين للاسمدة في العالم. روسيا تصرف من جيبها. و اوروبا كان موش جاها شتاء خفيف و لا راهي ما تنجمش تصنع. ملخص الحديث. عالميا فما تحسن. موش بالقدر الكافي لكن يبقى تحسن. بالنسبة لتونس: الحاجة الوحيدة الي تخوف هي الامطار. ما فماش مطر. و هنا الدولة لازم تحدد سياساتها. يا تضحي بصادراتها باش تعدل السوق المحلي او تستعمل المياه الجوفية على امل ربي يرحمنا بالمطر. الخيار الاول باش تضر الرؤوس الكبار المصدرة الي هوما اقوى من اي حد اخر. و الخيار الثاني باش تضر روحك و احتياطاتك في سبيل العملة الصعبة و دعم الميزانية و يا حي للعام الجاي. ربي يرحمنا بالمطر. سلام مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات