مبروك لتونس برلمان قيس سعيّد | برلمان يناسب حاجيات و بروفايل الشعوب التونسية | برلمان سيكلّل بالنجاح لعدة اسباب عميقة - موضوع جديد في المنتدى الذي تتابعه

منتديات تونيزيـا سات نسيب رمزي قام بنشر موضوع جديد في القسم الذي أنت تتابعه في منتديات تونيزيـا سات. مبروك لتونس برلمان قيس سعيّد | برلمان يناسب حاجيات و بروفايل الشعوب التونسية | برلمان سيكلّل بالنجاح لعدة اسباب عميقة الواحد ما ينجم يقول كان الحمد ل الله بعد انتهاء الدورة الثانية للانتخابات توقعاتي كانت في محلها، انتخابات الدورة الثانية ماهياش عروشية او قبلية، اللي ربحوا جابوا اغلبهم اصوات في معقل منافسهم اكثر منو هو. أول برلمان إنساني في تاريخ الدولة التونسية، في وقت تلقى فيه في مدينتك اللجنة المركزية للاحزاب القوية مثل النهضة و النداء حاطتلك مرأة مهمشة في القايمة متاعها، باش في مركز الولاية يطلعوا الرجاجيل متاع القايمة، و هكة الواحد يحس روحو غبي ينتخب حزب يحطلو فيه انسان ما يعرفوش: تعرف الحزب، اما ممثل الحزب ما هواش ولد او بنت الجهة اصلا، و وقتها حسينا بالاغتراب السياسي في البرلمان. توا حسب رايك و حسب نظريتك، سنية بن تومية أهالي المنستير عاجبتهم و مشرفتهم وقت كان السيستام مقسم البلاد ل 27 دايرة انتخابية و في ريف المستير طبيعي وقتها باش يطلعوا النهضة بالاساس ، لكنها تحسبت على المنستير المدينة معقل الزعيم. هي اسباب كثيرة يطول شرحها: دولتنا قاعدة تتقدم رغم الداء و الاعداء، و المستقبل افضل باذن الله. 1- التخفيض في عدد مقاعد البرلمان من 217 لاقل من 161 يعني اقل مصروف للبرلمان و يعني دمج المعتمديات الصغيرة (اللي فيها احيانا اقل من 20 الف نسمة مع المعتمديات ذات الحجم المعقول ب 50 الف نسمة) : تمثيل معقول و غير مبالغ مثلما في المرات السابقة، وين معتمدية فيها 100 الف يمشي منها مترشح و 5 معتمديات متاع 20 الف يمشي منهم 5 مترشحين. صارت عقلنة على النقطة هذه، بالرغم ساهمت في زيادة في العزوف عن الانتخاب. 2- تطريدة بضخامة للمهاجرين من تونس و تونس مهاجروها ليسوا بمغتربين: انتي في المانيا، جيبلي 400 تزكية (ياسين عياري متحصل على 265 صوت) اشنية الفايدة باش نبقاو نفلموا على ارواحنا؟ جار قريب خير من اخ بعيد. في الوجودية متاع الانسان، لما يختار الهجرة، فهو للاسف اختار تبديل وطنه بوطن افضل و اختار العيش تحت سياسة دولة يعتقد انها افضل من سياسة دولته. (طبعا كل واحد حر في تحسين ظروفه، لكنك لم تصبر و لم تراهن على نجاحك في تونس، لانك اعتبرت تونس هي جزء من المشكل و لم تواجه و اخترت الانسحاب، و ما يلزك عل المر كان الامّر منه) الدائرة الانتخابية بامريكا الشمالية : ماو لاباس؟ تي احنا في الوقت موش فرد وقت و قارة امريكا قارة هجرة و استقرار على طول. الدائرة الانتخابية بالخليج: ماو لاباس؟ كوكب قطر و كوكب الكويت في دول مدخول المواطن الاصلي قرابة 150 ل 100 مرة مدخول المواطن التونسي. مشاكل FCR و مشاكل ديوان بالخارج هي المشاكل الصحيحة: مجاملة هاوكة التونسيين بالخارج مداخيلهم اكثر من السياحة ب 4 مرات و قايمين برعاية اكثر من 1/3 المقيمين في تونس، لا فايدة منها. حرية التنقل لباقي التوانسة للدوائر الانتخابية في الخارج مستحيلة و تونس دولة مستضعفة باش يكون التمثيل البرلماني للتونسيين في الخارج قوي بشكل يعمل ظغط سفير: العادة السيئة خديناها من الدول الغربية مثل فرنسا وقت عندها المعمرين متاعها في الحمايات متاعها تابعين الامبراطورية الاستعمارية الفرنسية: فرنسا عندها les expatriés اللي باش يعاودوا يرجعوا لفرنسا و ليس des immigrés français بالاساس. المرحومة محرزية العبيدي النايبة السابقة ، جنسية تونسية و جنسية فرنسية و مترجمة في باريس خسرت صحتها بالفارغ هايني ماشية هايني جاية على تونس هاو طيارة فرنسية على ذمة فرنسا هاو جمل استفزازية "انا مواطنة فرنسية" هل نجحت باش تروحلنا بالمقيمين التوانسة في فرنسا؟ قدرت باش تحل مشاكل التوانسة في فرنسا؟ انا سعيد بالغاء التشويش الخارجي في شكل مشاكل المقيمين بالخارج اللي تونس ما عندها عليها حتى سلطة خارجية: المهاجرين يهاجروا لدول تعتبرنا احنا حديقتها الخلفية، موش هوما حديقتنا احنا الخلفية. هذا و كل مواطن بالخارج ينجم يروح لڨرمبالية او الروحية و يعمل حملة انتخابية غاديكة و اظاكاهو، طالما باش يثبت برجلة كون عندو الوقت باش يستقر في تونس. 3- و اخيرا برلمان للشباب صاحبي: في وقت كانوا فيه احزاب 1925 المرحوم البجبوج و 1941 الشيخ راشد تصول و تجول و الجيل متاعهم في اطار تقاسم الكعكة النيابية صحيح المخضرمين في السياسة باهيين؛ لكن الشباب هو اللي عمل الثورة و هو اللي فكولو الثورة تمثيل شبابي بامتياز لاني اكتشفت اللي يمارس السياسة بعد 65 70 تلقاها لاباس بيه مليح مليح و عندو متقاعد مريح: يعني ناجح ياسر في حياتو و زيد اذا المراة متاعو كبيرة في السن، جنسانيا، ما عندو ما يزيد ما ينقص و النار متاع الحياة و تغيير الواقع مشات على روحها. دولة شبابها الهدف متاع 90% هو الخروج من تونس و الحرقة الشرعية او غير الشرعية: لكنها عقلية حرقة من البلاد. ، لان الهجرة الشرعية يتصرفلها برشة فلوس في التكوين و في التامين و في مصاريف الادارية و في اعادة الملفات الخ الشباب اللي سرق منو الاتحاد و الاحزاب الثورة متاعو المحنونة. عبير 1975 مخلوف 1975 : صحيح شباب في وقتهم، لكن فروخ على الميدان. 4- 200 مليار تحويلات قطرية و اماراتية من المال السياسي الفاسد مشات على روحها: ميزانيات فلكية في الحملات الانتخابية لا فايدة منها طبعا تغيض كونها النهضة او النداء كانوا يصرفوا bien bien في حملاتهم الانتخابية : مصاريف تقدر بمعدل 500 مليون اللي ما تتقارنش بجرد 2،5 ملاين متاع مترشح عادي كراء الخيام / كراء الكراسي الفرق الموسيقية كراء القاعات المشروبات و البقلاوة كرادن الزيت و المقرونة و 1 كلغ من الملح توزيع الملصقات الانتخابية على المنازل و الدق على باب كل بيت اللافتات الكبيرة و العملاقة المقالات مدفوعة الاجر اذا في كل معتمدية باش تعمل كل نهار احتفال و تقديم و كذا و مشروبات و بقلاوة و كذا تحسب المصروف في معتمدية فيها 25 حومة، كل حومة تحبلها 10 ملاين؛ هاذوما جري 250 مليون مشاو بضحكة و لعبة بينما المترشح العادي، يتفاهم مع مطبعة، اذا طارت باش يفرق 10 الاف مطبوعة ب 200 مليم او 2 ملاين مصروف و زيدهم 500 دينار مصاريف متنوعة بين مازوط السيارة و كوستيم و اللي يغيضهم اكثر كون الاحزاب اتذلوا بالترشح بالقايمات 5 ـ غياب الهستيريا التفريخية متاع 10 قايمات لاحزاب نهضاوية لتميييع الانتخابات و تدمير الاحزاب الاخرى : بقدرة قادر في الانتخابات، تجي تلقى سي مورو عامل حزب بوحدو في الانتخابات بقدرة قادر وجوه نهضاوية، تجي تلقاهم في الانتخابات عامل شبعة احزاب تكتيك خبيث برشة يعملوا فيه هو سياسة تميييع الانتخابات باش هوما ديما يربحوا ما نحكيوش على اختراق اي حزب اخر بعنصر محسوب على العايلة النهضاوية لكن تجي تضرب في الانتخابات التشريعية القديمة: تلقى 30 حزب، منهم 10 احزاب تابعين النهضة لتمييع الانتخابات باش النهضة تربح و الجماعة اللي عاملة روحها ضد النهضة هاوكة صوتها يمشي لواحد تابعهم اما ما يمشيش ضدهم. حبوا يحشموا على ارواحهم في بلاد فيها 250 حزب، و في الانتخابات؛ قياديين نهضاويين محليين يعملوا بلعاني قايمات جديدة نكاية فيا الاحزاب الاخرى. ما اتنجمش تربحهم لانها ماكينة قوية ياسر و ماكينة جهنمية. عدد معقول من المترشحين عموما في المعدل 5 مترشحين يمكن الاختيار بينهم بسهولة اسهل من 30 حزب تكتشف وجود 25 حزب جديد في مدينتك يوم الانتخابات التشريعية الحزبية الركيكة القديمة. 6. برلمان لن يكون حلبة للصراعات الجيوستراتيجية بين معسكري قطر/تركيا و معسكر الامارات/فرنسا : برلمان الخونة السابق لمزبلة التاريخ كرّدونا جماعة النهضة و تركّونا : اي جعلونا اكرادا في اتون نار الحرب العراقية الايرانية 1982 او حرب الخليج الاولى. رئيس برلمان الشيخ راشد يمشي يهني اردوغان باول سيارة تركية و يروح لتونس على متن طائرته الخاصة. البرلمان السابق في نهاية الامر فخار يكسر بعضو: و العميل القطري سيف مخلوف و العميلة الاماراتية عبير موسي عوض الاهتمام بحل المشاكل التونسية قاعدين يعملوا في مزايدات رابعة العدوية مع النائب راشد الخياري رابعة العدوية. هذاكة علاش الاحزاب ما تتماشاش مع بروفايل الشعوب التونسية: الاحزاب تشريها دول اقوى منا تعتبرنا حديقتها الخلفية و تشيخ علينا. من حسنات قيس سعيّد أنّه هزم الاحزاب وحده، و جاب ربي في الاسلام كلمة الاحزاب كلمة دونية و ترادف العصابات و النوايا الشريرة . مالانا و مال مشكلة مصرية داخلية: طبعا لان الوطن عند النهضة هو عالم الاخوان و لا يقع في الدولة التونسية. و طبعا وقت يقولك حضر امتحان تونس، تمشي تحضرلو امتحان مصر و تركيا، تاخو صفر و تروح للدار فرحا مسرورا. 7- برلمان سوف لن يكون فيه سي سفيان طوبال: رمز المال السياسي الفاسد المحلي و السياسة الحزبية : صعوبة السياحة الحزبية و اشتراء الذمم (ب 217 مليار او 70 مليون دولار تشري برلمان كامل) باش تشوف ركاكة الاحزاب و لجانها المركزية سفيان طوبال ماهواش ڨفصي، و ما تولدش في ڨفصة، و عمرو ما خدم في ڨفصة، و ليس مقيم في ڨفصة، و بالاحزاب، و بمنطق الاحزاب، رغما عن انفك يعديلك مترشح من اللجنة المركزية في البرلمان و هو ما هواش ولد المنطقة. وقت استاذ تعليم ثانوي من الثراء السياسي الفاحش يدورها يرشق في الملاين على رقاصة: هاذيكة نتيجة المال السياسي الفاسد و الضحك على الذقون. مع برلمان قيس سعيّد، ماكش ولد المنطقة يستحيل باش تتعدى. كيفاش باش تنجم تهبط لمقاهي المدينة و انتي لهجة المدينة خاطيتك. كيفاش باش تنجم تفهم مشاكل الاهالي و انتي ماكش عايش مشاكل الاهالي. راهو عشرات المترشحين قبل كانوا ماهمش اولاد بلاد، و الاخر يحكيلي على سلطة الشعب، و هي سلطة الاحزاب المركزية الركيكة. 8. بن مبروك و الريعونات: اشكون باش يمررلهم قوانين ريعية فاسدة على مقاسهم (نسبة المحامين التجار السياسيين نقصت برشة) و صعوبة اشتراء جماعي بجرد تاليفون لمونبليزير قيس سعيد ما ينجمش يحارب الفساد بالشكل الكافي، لان له ترسانة قوانين فاسدة وضعتها احزاب فاسدة (مثل قانون اليخوت، و قوانين المساحات الكبرى). البرلمان السابق كان الريع شاريه، توا الريع باش يلقى مشاكل كبيرة باش يجبد كل نايب على شيرة باش يشريه. لان النايب اللي باش يبيع روحو و يبيع امانة الاصوات اللي عندو، باش يتحرق سياسيا و خصوصا الادانة ساهلة، لان القوانين اللي صادق عليها و هي في تضارب مع برنامجه الانتخابي باش تعطي المشروعية لمحكمة الطعون لسحب الوكالة. (ما نحكوش على ابتزاز قانون سحب الوكالة بشكل مريض و شمايتي، لان المحكمة باش تبت في الموضوع و ليس تعمل سحب وكالة من اجل سحب وكالة في اطار عقلية فروخ). صلاحيات فرعونية هو مصطلح حشوي وقت الدولة عندها التزامات متواصلة لقروض من عهد بن علي و الترويكا و الاحزاب السابقة، و وقت الفساد فاسد في الزيت المدعم و السكر المدعم و القمح المدعم (اما نجوعكم او نحرقوا البلاد او ترضوا بالفساد). الارهاب في وقت قال عليه قيس سعيد _ وقت ما عادش يجيبوه في التلفزة _ اقوى من الدولة او من الدولة. الفساد حاليا اقوى من الدولة، و هو عقلية ابتزازية موجودة حتى عند الاتحاد العام للشغل في عقلية توريث الوظائف العمومية. 9 _ سحب الوكالة و تصبح اللعبة البرلمانية عادلة: اذا النايب طلع فرخ او عامل برنامج انتخابي وهمي ، يتحاسب قدام محكمة الطعون. انتهى وقت المسامح كريم، و نايب غير جدي باش يعمل من البرلمان سيرك. 10% من الناخبين يتقدموا بعريضة سحب وكالة تنظر فيها محكمة الطعون. المحكمة تثبت هل النايب جدي او غير جدي؟ طبعا باش ما تكونش الحكاية فيها ابتزاز و شماتة. و هذا ضروري و لا سيما الكرسي يغر البشر و يخليه عايش في سعادة "السيد النايب" 10- نظام انساني و ليس قائمات متصنعة: ما حاجتيش بتوافقات، حاجتي بانجازات و بقواعد لعبة عادلة بين المواطنين في اي نظام سيكون هناك المستفيدون و المتضررون، و سيكون هناك الصاعدون و النازلون الاشكالية هي وقت تكون قواعد اللعبة بين المواطنين غير عادلة وقت زوز مواطنين في مناظرة عمومية، تحس الدولة ملكية توريثية و ليست جمهورية، ولد النقابي يتم انتدابه و اللي باباه موش نقابي عليه بصبري. وقت زوز مواطنين في طلب رخصة، تحس الدولة اقطاعية، هذا بن يدر يحتكر القهوة بضخامة هو و سي اللوز، و البقية تحسهم يلزم يرضى عليهم سي بن يدر و سي اللوز باش يحمص معاهم شوية قهوة. العباد غلطت وقت يقولك "انتخبت النهضة و ندمت" من منطلق ما دبرولاش بلاصة في الوظيفة العمومية و حاسب روحو من حجر الواد. بينما اللي حاجتنا بيه، هي دولة تعطي الفرصة للجميع باش يتالق و يحقق احلامه و ليتنافس المتنافسون. عمرو ما كان هدف الدولة جعل الجميع اثرياء في دولة غير نفطية كثيرة عدد السكان ، لكن يجب اعطاء فرصة حقيقية لمن يريد الرفاهية ان يصل اليها عن طريق العمل او طريق الاستثمار. المصيبة هي وقت تخدم ما تصورش، تستثمر تفلس و ما اتنجمش تاكل الخبز. ____________________________________ في الختام البرلمان تكتيكيا باش يكون لوبي الشعب، رغم ان اغلب عقليات الشعب فاسدة ان شاء الله برشة حاجات تتصلح و تتريڨل و حلاوة البرلمان على الافراد سيعمل الاحزاب على تقزيمها لان نجاحها يعني انهم احقر و اتفه ما وجد ضد مصلحة مواطني هذا البلد. البرلمان سيكون ناجحا باذن الله، لانه صمم بطريقة تجعل منه صعب الاختراق. كل قبيلة و كل قوم في هذا البلد اختارت احسن فرسانها دون حشويات التناصف بين الرجال و النساء : التناصف تم وضعه على مستوى التزكيات، لان الاحزاب من نهضة و نداء في البلايص المضمونة، يحطوا مرأة كديكور و الحكم بيد التماسيح. مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات