ميدان العملات الرقمية فرفشوه "الفروخ" و هلكوه الشرّاف بالتفليم و الكذب و التلاعب | أصبح مجرّد لعبة مغرية فيها مواسم E(x)>0 | يمشي الجافل ويجي الغافل - موضوع جديد في المنتدى الذي تتابعه

منتديات تونيزيـا سات نسيب رمزي قام بنشر موضوع جديد في القسم الذي أنت تتابعه في منتديات تونيزيـا سات. ميدان العملات الرقمية فرفشوه "الفروخ" و هلكوه الشرّاف بالتفليم و الكذب و التلاعب | أصبح مجرّد لعبة مغرية فيها مواسم E(x)>0 | يمشي الجافل ويجي الغافل كتونسي يعاني من التضخم و ضعف الدينار، كنت حماسي في الماضي لفكرة البيتكوين كون باش يحمي الاقتصاد من التضخم و كذا. ما كنتش مغرم بالتكنولوجيا، كان الهدف نفعي بالاساس و متاع صاحب مصلحة، كون الواحد وقت يرقد فلوس بالعملة المشفرة و بالتحديد البيتكوين على طول الوقت، يحمي الدينار و امواله من الضياع، بحكم فمة عدد محدود من البيتكوين. لين جات حرب روسيا، و بينت كون البيتكوين يتبع النظام العالمي و تحت سيطرته. 1. الفروخ و كثرة التمفريخ و السرقة: لكن عمناول كل مرة يطلع "فرخ" عندو منصة و الغالب عندو عملة، يلعب بالاف المليارات، بسطر من الكود يحول الاموال متاع الحسابات متاع المشتركين في المنصة لحساباته الشخصية. و يتسبب في خوماضة و يطيح السوق بنسبة 40%. اشنوة تحبني نسميهم؟ هذاكة هو اخلاق الفروخ، تقدّرهم و هوما صغار، و يطلعوا خونة و موش رجال. Faruk Faith Ozer فرخ تركي 1994 لكن يلعب بالاف المليارات ، عامل منصة Thodex قالب الحرفاء متاعو في 2000 مليون دولار و شدوه مؤخرا في البانيا Do Kwon فرخ كوري جنوبي 1991 لكن يلعب بالاف المليارات ، عامل عملة Luna , terra و مخربقها باش ينحي للمستثمرين فلوسهم الخ Sam Bankman-Fried فرخ امريكي 1992 لكن يلعب بالاف المليارات ، صاحب منصة FTX اللي تعمد باش يفلسها و دازز فيها نية في الهبال Vitali Buterin فرخ كندي من اصل روسي ، 1994 لكن يلعب بالاف المليارات ، صاحب باتيندة ثاني اهم عملة مشفرة الايثاريوم، دازز فيها مڨربع اخر مرة بايع في القمة 100 مليون دولار ايثاريوم للقطيع تقولي تشجيع الشباب و ستارتاب و كذا، لكن هاذوما خونة للعباد اللي عطتهم ثقتهم الحقيقة متاع الميدان ما عندكش رجال كبار و متقاعدين يكوروا اساسا في الميدان، في ميدان فلوس و سلوكات صبيانية الزوز اللي في الوسط هوما اللي ساهموا بتطييح السوق لنصف قيمته 50% من 32 ل 16 في البيتكوين، و يعني يلزم السوق يتضاعف و يعمل 100% باش يرجع وين كان. كيفاش نحبوا المستثمرين الكبار و الدول تتبنى البيتكوين و الدومان فيه الفروخ هاذوما؟ Ce n'est pas sérieux وقت يشوف الحوايج اللي لابسهم "الفرخ" متاع الايثاريوم. وقت صندوق تحوّط يجي يعمل تحليل مالي، يلقى زوز فروخ مدمرين السوق ب 50% هبوطا. قائمة الفروخ طويلة و عريضة في الميدان، و يجيك واحد يقولك عملة ترون باهية و فيها مستقبل، و هو مولاها الفرخ الصيني هذا Justin Sun اللي دمر عملة بيتتورانت 2. الكذب متاع شركة MicroStrategy و غيرهم: الشركة هذه لاغراء الناس اللي ما تعرفش، عاملينها زعمة زعمة تشري في البيتكوين باسوام و كونها اسوام باهية، و يعملك رابط الحافظة كونها زعمة زعمة حكاية شفافة. لكن كلو كذب و تفليم لانو عمرها شركة استثمارية جدية ما تشري بيتكوين في 60 الف. و فمة شركات عاملة روحها شارية في 50 الف، لكنها تتزعبن و تعمل في اشهار ليها فقط لدى جماعة العاب الفيديو. من غير ما نعطيو دروس على التفليح متاع ايلون ماسك و غيرو 3. ميدان فيه الفروخ تصول و تجول، و الشراف يهبطوا يتزعبنوا، و المليارات على الطاولة : أصبح الميدان لعبة و يتفسر بنظرية الالعاب خير. ما تقوليش ميدان استثماري وقت فيه عملة مثل سولانا في ظرف عام تهبط من 260 دولار ل 8 دولارات يعني قرابة تطيح من 100 ل 3 او تفقد 97% من قيمتها و تعاود ترجع. و بعد الاستثمار يكون في حاجات فيهم قيمة مضافة و انتاج حقيقي: العالم لا يحتاج العملات المشفرة او يحتاج زوز فقط: انا شخصيا احتاج و استعمل حاليا العملة الرقمية الثابتة USDT. ما تقوليش تكنولوجيا و كذا: هو تذبذب الشديد للعملات يجعل منها غير جذابة لاعتمادها في البيوع و الشراء : نبيعلك 10 كيلو بطاطا ب 10 دوج، نجي بعد 8 سوايع، نلقى الدوج خسرت 20% من قيمتها، او زادت 20% من قيمتها. مشاريع من اجل التمشرع: اللي يحك راسو يعمل عملة و مشروع حشوي لايجاد تعلة لتلك العملة. توا مؤسس كاردانو او سولانا ملزوم عليهم باش يعملوا عملات للشبكات متاعهم، محسوب ما ينجموش يستعملوا البيتكوين كعملة خلاص في استعمال الشبكات هاذوكا. مشاريع تافهة، من نوع تجري تاخو فلوس، من نوع تعدن باستعمال التاليفون الخ الميدان ما هواش قمار بشرطه لان تعريف القمار هو كل لعب يشترط فيه غالبا أن يأخذ الغالب شيئا من المغلوب، لان الغالب و المغلوب لا يمكن التعرف عليهم، لكن فمة رابح و فمة خاسر اشترى في السعر الغالي جدا و لم يصبر على عودة السوق للسعر الغالي و رضي بالبيع بالخسارة. حلم ان البيتكوين و العملات المشفرة ضد التضخم هو مجرد اوهام خدعوني بها شخصيا كما يتم الترويج له عبر التخزين، اما بالحق ضد التضخم وقت تشري وقت يطيح ياسر و تبيع وقت يطلع ياسر في اطار اللعبة هذه. استثمار في العملات المشفرة اذن هو مفهوم حشوي : الاجدر هو اللعب في هذا الميدان و نظرية الالعاب تواتيه مليح (فمة اشرار، فمة مفاجأت، فمة سيناريو، فمة ستاج الوحش، فمة جوكارات، فمة هدايا، فمة تشويق، فمة خدع، فمة تمويه، فمة الملاعبية اللي عندهم خبرة الخ) 4. هل لعبة العملات المشفرة لعبة عادلة ام لا؟ Jeu équitable E(x)>0 بالنسبة للعباد اللي قرات لحد 6 ثانوي، ربما تتذكر حكاية Espérance (X) و حكاية تمرين le dé truqué يقولك باش تعرف هل هي لعبة عادلة من ضمن العاب الحظ ام لا: يعني يضمنلك اللي عندك 50% حظوظ باش تربح. يلزم تحسب E(x) في ثقافة الامريكان و لاس فيڨاس، العاب الكازينو الكل فيهم E(x)<0 يعني يستحيل هزم الكازينو. اذا تلعب ب 1000 دينار: تشري بيهم عملة مشفرة محنونة تعمل X10 و تخرج من السوق و تقتنع بذلك تكون ربحت 9000 دينار، كيما ينجم يرجعو /10 و يرجعو 100 دينار و تكون هيك خسرت 900 دينار و يبقولك 100 دينار . 10 = 10 millions 0.1 = 100 dinars 0.5 = 50% (probabilité 50%) E(x) = 0.1 x 0.5+ 10 x 0.5 = (0.1 + 10 ) x 0.5 = 10.1 x 0.5 = 5.05 > 1 million اللعبة هذه تبدو مغرية جدا وقت تشري في القاع الحقيقي و تكون لاعب ممتاز يصبر 3 سنوات للاقتناء في القاع، لتعزيز حظوظه. يعني عندك امل في مرابيح 5 ملاين تقريبا او عائد استثماري في اللعبة ب 500% تقريبا لكن الوجه الاخر لها، هو لعبة انتحارية وقت يشري في القمة، لكنها ليست لعبة سيئة جدا طالما لا يخسر اكثر من المبلغ اللذي لعب به. اذا اشتريت مثلا بعد التغرير بك البيتكوين ب 60 الف او يجي يقولك صديقك اللي قالو صديقو الدزيري او المغربي "الامريكان يشريوا في السولانا و هي سومها 240 دولار الكعبة" و تحشم منو تقولو بديبلوماسية راهي achetable كان بين 80 و 60 و انا ما نشريها كان اقل من 20، و هو ماشي في بالو السولانا باش توصل 500 او 1000 دولار و متجاهل كونها عاملة اكثر من X 10. تجي تحسب E(x) 10 = 10 millions 0.1 = 100 dinars 0.01 = 1% (1% - probabilité 99%) E(x) = -0.1 x 0.99+ 10 x 0.01 0.199 = 199 > 1 million تجي تلقى E(x) في 199 دينار و هو يلعب ب 1000 دينار مع 99% البيتكوين باش يطيح بعد ما وصل 60 الف اللعبة هذه تتلعب على سنوات و كل مرة فمة جرية جديدة تقريبا اللعبة فيها دورة جديدة مرة كل 3 سنين Bitcoin Market Cycles 5. يمشي الجافل ويجي الغافل: بما انها لحد الان لعبة ناجحة و خصوصا صانع السوق الشهر اللي فات، لا يتوانى عن اثبات قوته كونه ينجم يعمل pump من الحيط بدون اسباب حقيقية ب 50%. يغري اللاعبين القدم اللي خرجوا وقت البيتكوين ب 60 الف لاعادة اللعبة و الكرة مرة اخرى. السولانا من حضيض 8 دولارات توا في 24 دولار في اقل من شهر 200%. هاوكة الاغبياء اللي شرات في القمة يصبروا فيهم بالتخزين و اكتبهم في ورقة و اجبدهم بعد 5 سنين و كذا. و اللي موش فاهم قواعد اللعبة، يقولك دومان زفت و قمار و تلاعب و تحيل. بينما قواعد اللعبة واضحة ياسر. الانتداب و التدغيف مخصصينلو جيوش كاملة في اليوتوب و التلغرام و الفايسبوك باش يغرموا العباد بالكريبتو كميدان استثماري و كتكنولوجيا محنونة، لكن حد ما يحكي على قواعد اللعبة لان الهدف هو انتداب ضحايا جدد و ان شاء الله ما يفيقوش بحقيقة اللعبة. اتنجم تشري USDT في افريل 2021 و تقرر تنتظر لبداية جانفي 2023 و تستنى 20 شهر باش تشري القاع و تعمل X10 المحنونة، لكن برشة حصلوا في منداف اللعبة. اللعبة ما ترحمش، لكن اللي يعرف كيفاش يلعب و عندو الصبر و رباطة الجأش مليون يرجعها 10 ملاين. بعد حلال او حرام، اللعبة هذه. ما انجمش نفتي. اللي يسال السوق مغرفة على الاقل يرجعها. لكن كيما تعرفوا اللالعاب يلعملوا الادمان. و هل يا لندرى باش يوصل ل 200 الف البيتكوين المحنون و يعاود يطيحه ل 20 الف و هي ماشية؟ زعمة باش يلقى دغف المرة الجايف تشري بتكوين ب 50 الف و 100 الف؟ الحاصيلو، مزيج من الفروخ و الشرّاف تلعب ب الاف المليارات، و قواعد اللعبة يظهرلي واضحة و شكرا. مشاهدة هذا الموضوع منتديات تتابعها الرجاء عدم الرد على هذه الرسالة. يجب عليك زيارة المنتدى للرد. تم إرسال هذه الرسالة لك لأنك اخترت متابعة القسم "المنتدى العام" في منتديات تونيزيـا سات مع إشعار بالبريد الإلكتروني عند وجود مواضيع أو مشاركات جديدة. لن تتلقى أي رسائل أخرى حول هذا الموضوع حتى تقوم بقراءة الرسائل الجديدة. إذا كنت لا ترغب في تلقي المزيد من هذه الرسائل، يمكنك تعطيل الرسائل من هذا القسم أو تعطيل كافة الرسائل. قم بزيارة منتديات تونيزيـا سات